„Njeje rjeńšeho, hač přez wuznamjenjenje čestnohamtskeho dźěła skutkowanje Serbow za naš serbski lud připóznać.“ tak wita předsyda Domowiny Dawid Statnik lawreatow na lětušim wuznamjenjenju Myta Domowiny a Čestneho znamješka Domowiny dźensa wječor w Budyskim Serbskim domje. Mytowanski wuběrk Domowiny je pod nawodom swojeje předsydki Lenki Thomasoweje z wulkeje ličby zapodatych namjetow lětsa jědnaće lawreatow wuzwolił.

Myto Domowiny 2023

dr. Pětš Šurman z Chóśebuza

Dr. Pětš Šurman angažuje so hižo lětdźesatki dołho čestnohamtsce na wšelakich polach serbskeho kulturneho žiwjenja. 1990 zasadźowaše so Pětš Šurman za wozrodźenje Maćicy Serbskeje w Budyšinje. W lěće 2006 bu wuzwoleny na předsydu Maśicy Serbskeje a nawjeduje ju hač do dźensnišeho. Z toho časa organizuje prawidłownje zetkanja a přednoški. Wosebje wažne je Šurmanej wabjenje dorosta za sorabistiske dźěło. Ze zawjedźenjom Maćičnych mytow w lěće 2011 su so stajnje namjety z Delnjeje Łužicy zapodali - za Myto Bogumiła Šwjele a za Myto Arnošta Muki. Tež jeho aktiwne skutkowanje w Domowinje jeho wuznamjeni. Wot lěta 1991 do 1993 bě zastupowacy čłon Zwjazkoweho předsydstwa Domowiny, mjez 2005 a 2009 bě jeho rjadny čłon. Wot lěta 2013 je čłon župneho předsydstwa Domowinskeje župy Delnja Łužica z.t. a wot lěta 2021 je jeje župan.

Milan Hrabal z Warnoćic

Na čěskej stronje je zašłe tři lětdźesatki jenož mało ludźi było, kotřiž su na telko polach a w tajkej kwaliće za to dźěłali, zo su Serbja w Čěskej nadal prezentni a serbsko-čěske styki čiłe. Milan Hrabal je čłon čěskeho PEN kluba, Zwjazka serbskich wuměłcow a předsydstwa Společnosti přátel Lužice / Towarstwa přećelow Serbow. Prěnje akcije, kotrež wón we Warnoćicach čestnohamstce organizowaše, běchu předstajenja serbskeho dźiwadła, přednoški a wšelake wustajeńcy. Milan Hrabal přełožuje modernu serbsku lyriku a je sam basnik. Někotre knihi Milana Hrabala buchu zeserbšćene a do němčiny přełožene. Hromadźe z Lukašom Novosadom wudawa rjad Lužickosrbská poezie (Serbska poezija), w kotrymž předstajataj klasisku a modernu serbsku poeziju w nowych čěskich přełožkach. Hižo lětdźesatki so Hrabal tež wo to stara, zo su Serbja w čěskej zjawnosći, w čěskej zjawnej diskusiji tema.

Myto Domowiny za dorost 2023

Serbska murja

Kolegium Zakładneje šule Krabat w Janšojcach

Čestne znamješko 2023

Günter Sodan z Malešec

Herbert Stiller z Chrósćic

Dytar Freihoff z Markojskeje Góle

dr. Renate Harcke z Barlina

Holger Mäkelburg z Trjebina

Dieter Stoppel z Horow

Franc Langa z Koćiny

W mjenje mytowanych měješe dr. Pětř Šurman poslednje słowa. Wón wuzběhny, zo Myto Domowiny “jenož dźak za nas [mytowanych] njeje, ale za wšěch, kiž so čestnohamtsce za Domowinu a to serbske angažuja.” Při wšěch wužadanjach hlada Pětř Šurman optimistisce do přichoda čestnohamtskeho skutkowanja: “To serbske leži nam we wutrobje.”

Wutrobna gratulacija wšěm mytowanym.

Foto: Jurij Helgest