Wjac hač sto ludźi je přichwatało na zarjadowanje wotkryća tafle za serbskeho misionara Jana Awgusta Měrćinka, kotrež wotmě so 3. oktobra w Hrodźišću. Chór Budyšin w narodnej drasće ewangelskich Serbow zarjadowanje swjatočnje wobrubi.

Županka Leńka Thomasowa hosći serbsce postrowi, runje tak kaž Jürgen Arlt, měšćanosta Wósporka. Hromadźe z Norbertom Piekarekom, twarskim nawodu za postajenje pomnika, wotkrychu pomjatnu taflu. Zhotowił je ju Budyski grafikar Ralf Reimann w swětłomódrej-běłej barbje, kiž ma lód a Antarktiku wotbłyšćować. Ležownosć je město Wóspork k dispoziciji stajiło. Wjesna zhromadnosć je so wo zastaranje z napojemi a jědźu na zarjadowanju postarała.

Budyska župa “Jan Arnošt Smoler” je we wubědźowanju simul+ pjenježne myto dobyła. Z tutych srědkow je pomnik bjezposrědnje při ródnym domje Měrćinka zestajeny. Zwjazk serbskich rjemjeslnikow a předewzaćelow je projekt tohorunja podpěrał.

We farskej bróžni, kiž su wjesnjenjo swjedźensce wupyšili, sćěhowachu postrowne słowa. Županka Thomasowa pokaza na serbski pochad Měrćinka. Dźensniši dźěń je so na njeho w Němskej nimale pozabyło. Zaměr župy “Jan Arnošt Smoler” a Domowinskeje skupiny Worcyn, Njechorń, Běła Hora bě to změnić.

Dr. Lubina Malinkowa předčita postrow Opelec mandźelskaj, kiž staj knihu wo Měrćinku pisałoj a na wotkryću přebywanja we wukraju dla přitomnaj być njemóžeštaj. Měšćanosta Arlt zwjaza swoje słowa z dnjom Němskeje jednoty. Minjene 34 lět běchu časy změnow a wužadanjow. Přiwšěm widźi a waži sej wón zhromadnosć wjesnjanow Hrodźišća, najstaršeho wjesneho dźěla gmejny Wósporka.

Marko Šiman, zapósłanc Sakskeho krajneho sejma, chwaleše sebi dar na dnju Němskeje jednoty za domiznu a korjenje. Dźakowaše so Domowinje, zo je projekt podpěrała a pozitiwnje wuzběhny, zo je tež we wuchodźe wokrjesa móžno, na prjedownikow spominać. Dr. Lubina Malinkowa rysowaše 130 hosćom žiwjenje serbskeho misionara z wusahowacymi stacijemi. Jeho powołanje za misionarsku słužbu na połkupje Labrador, pytanje ekspedicije britiskeho polarneho slědźerja Sir Johna Franklina na łódźi Investigator, wuswobodźenje z wěčneho lodu a nawrót do Łužicy, po tym zo bě dalše lěta na misionstwje w Južnej Africe był. Malinkowa wuzběhny, zo bě Měrćink hordy na swoju serbsku rěč a je druhim wo njej rozprawjał. Wona namołwješe přitomnych, zo “njech kamjeń dopomha, zo so Měrćink w domiznje njezabudźe a zo so dalše generacije z nim zaběraja”.

tekst a foto: Katja Liznarjec