Wčera běše nowolětne přijeće sakskeho zastupnistwa w Praze. Nawodnica knjeni Ofnerowa wita nimo sakskeje statneje ministerki Meieroweje a čěskeho městoministra za regionalne wuwiće zdobom něhdźe 100 partnerow z mjezynarodnych projektow a politiskich zastupjerjow.

Po wotewrjenju wustajeńcy tekstilneho wuměłstwa ze Sakskeje předstaji Ofnerowa přitomnym hosćom nowu koleginu. Serbowka Katrin Nowakowa, pochadźaca z delnjołužiskeho Mósta, je wot spočatk lěta wotrjadowana z SMWK a zesylnja sakski team w zastupnistwje w Praze. We wólnym dźělu wječora rozmołwještaj so Judith Šołćina a Clemens Škoda wot Domowiny z njej samozrozumliwje serbsce a wupřeještaj jej wšo dobre w nowym nadawku. Jednaćelka přepoda zastupjerjam zastupnistwa hišće małku překwapjenku - tradicionelne ptačokwasne pječiwa.