Prezidij Domowiny faworizuje sobotu, 12. junija, jako termin přestorčeneje hłowneje zhromadźizny. Doskónčny rozsud twori zwjazkowe předsydstwo 29. januara, kiž budźe so zaso přewažnje digitalnje schadźować. Na swojim posedźenju srjedu wječor w formje widejo-konferency je prezidij nimale sto naprawow w 13 tematiskich wobłukach jako naćisk dźěłowych směrnicow 2021 do 2023 wobzamknył. Hač do hłowneje zhromadźizny, kiž rozsudźi, móža jón župy a čłonske towarstwa třěšneho zwjazka dodiskutować. Po tym je so gremij, wuradźowanje zwjazkoweho předsydstwa přihotujo, rozprawje 2020 a lětušim ćežišćam dźěławosće zarjada wěnował. Tež 26-stronsku rozprawu Rěčneho centruma WITAJ (RCW) wo swojim dźěle zašłeju lět a plan 2021 su woni wobjednali. Wón wopřijima mjez druhim pola kaž kubłanskopolitiske dźěło, certifikowanje rěčnych kmanosćow, nadźěłanje wučbnych materialijow a internataj w Budyšinje a Chóśebuzu. Domowina chce dale Domizniskemu muzejej Dešno poboku być, kotremuž je hamt Bórkowy dotalne přiražki šmórnył. Zastupowacy jednaćel Marcus Końcaŕ je so hižo runja Maćicy Serbskej, RCW Chóśebuz a Spěchowanskemu towarstwu Serbskeho muzeja Budyšin ze zjawnym listom za wohroženy muzej zasadźił, kotryž běše wutoru tež tema na posedźenju Bramborskeje serbskeje rady. Předsyda Domowiny, Dawid Statnik, zjimaše: „Dešnjanski Domizniski muzej je regionalna swětłownja serbskeje kultury a serbskeho kubłanja, kotraž hranicy gmejny Dešno-Strjažow přesahuje a po cyłym teritoriju hamta skutkuje. Muzej je tež atrakcija za turistow w Błótach, a tež zeznajomjenju wjele šulerjow na přikład w ramiku ,šule w zelenym’ RCW ze serbskim herbstwom a žiwjenjom regiona polěkuje. Tohodla njemóže a njesmě narunanje personelnych kóštow jeničce nadawk potrjecheneje gmejny być, kotraž by z tym přežadana była. Budźemy so zhromadnje z partnerami za rozrisanje na dobro muzeja angažować.”