Wjacore sobudźěłaćerki a wjacori sobudźěłaćerjo Budyskeho Serbskeho Muzeja a Domowinskeho zarjada dojědźe sej wčera do Wrócławja. Zhromadnje ze Sakskim zastupnistwom na městnje su zamołwići institucijow přećelow Sakskeje w Pólskej kaž tež přećelow Łužiskich Serbow na serbski kulturny wječor přeprosyli.

Hižo dopołdnja wotměchu referenća a regionalne rěčnicy Domowiny w tamnišim Sakskim pósłanstwje swoje słužbne wuradźowanje. Jako hosćo wobdźělichu so sobudźěłaćerki a sobudźěłaćerjej Serbskeho muzeja Budyšin. Hłowne temy běchu dalewuwiće narodneho muzeja Serbow na Lawskim arealu a dalše zhromadne dźěło za Serbow.

Serbski kulturny wječor zahaji so z wjedźenjom po wustajeńcy “Wšo je krajina/Wšykno jo krajina“ serbskeho wuměłca Jana Buka. Wona je wot 15. septembra 2023 w Muzeum Miejskie we Wrocławiu přistupna. Składnostnje jeho 100. narodnin a na přeće wuměłca samoho je Serbski muzej wustajeńcu  Buka we Wrócławju zarjadował. Kaž direktorka muzeja Christina Boguszowa wuwjedźe, je to město, w kotrymž je Jan Buk swoje wuměłske wukubłanje zahajił a wěsty čas studował. Sobudźěłaćerka wotrjada stawizny wuměłstwa a teorija wuměłstwa na uniwersiće w Zielonej Górje, dr. Lidia Głuchowska, předstaji wuměłstwo rowjenkow (Weggefährten) Jana Buka z časa jeho přebytka we Wrócławju.

Po wjedźenju podachu so přitomni do njedalokeho Sakskeho zastupnistwa, hdźež jich nawodnica Anna Leniart witaše. Wona wuzběhny wažnosć hranicy přesahowaceho zhromadneho dźěła. Nimo toho porěčachu direktorka Serbskeho muzeja Christina Boguszowa a předsydy Domowiny Dawid Statnik. Wo hudźbnu chłóšćenku postara so skupina Astronawt.

Wažnosć tajkich zhromadnych zarjadowanjow za dalše pohłubšenje stykow wuzběhnychu w swojich dźaknych słowach nimo organizatorow tutoho wječora tež zastupjerjo asociěrowaneju towarstwow Domowiny w Pólskej, a to zdźěla serbsce.

Pozadk k Janej Bukej

Jan Buk je najwuznamniši serbski moler 20. lětstotka. Z jeho wosebitej zasłužbu je, zo zahaji srjedź 1970tych lět ze swojim tworjenjom wažny nowy wotrězk za dalše wuwiće serbskeho tworjaceho wuměłstwa a z tym zwisk serbskeho wuměłstwa k modernje zmóžni. Jeho načasne molerstwo bě za serbske wuměłstwo směrodajne a wotewri z tym slědowacej generaciji młodych serbskich tworjacych wuměłcow nowe puće. Serbske temy a sujety staješe dale a bóle do kompleksneho a njewučerpajomneho zwiska, njepředstaješe je (kaž dotal) hižo přez folkloristisce zapołožene, dokumentariske a zdźěla plakatiwne wašnje molowanja.

Fota: Domowina/Božena Šimanec

1_ Sobudźěłaćerki a dźěłaćerjej Serbskeho Muzeja wobdźělichu so na wuradźowanju referentkow, referentow a regionalnych rěčnicow Domowiny. Wosebite zetkanje wotmě so w Sakskim pósłanstwje we Wrócławju.

2_ Direktora Budyskeho Serbskeho muzeja Christina Boguszowa je přez wustajeńcu Jana Buka “Wšo je krajina/Wšykno jo krajina” wjedła, kotraž je we Wrócławskim měšćanskim muzeju přistupna.

3_ Z hnujacymi spěwami zakuzła skupina Astronawt přitomnych na serbskim kulturnym wječoru w Sakskim pósłanstwje we Wrócławju.

+ Für die Übersetzung nutzen Sie gern die sotra.App: sotra +