W srjedźišću wuradźowanja referentow a regionalnych rěčnicow Domowiny na widejo-konferency wobdźělnikow w Serbskimaj domomaj Budyšina a Choćebuza stejachu rozprawy projektnych managerow. Rejzka Krügerowa poda informacije wo zhromadnym dźěle ze Spěchowanskim kruhom za serbsku ludowu kulturu a Zwjazkom serbskich wuměłcow. Zakład dźěławosće je kooperaciske zrěčenje tuteju nadregionalneju towarstwow z třěšnym zwjazkom, kotryž tak dźěławosć čłonskich towarstwow podpěruje. Tež prawidłowne dźěło ze župomaj Budyšin a Kamjenc je wobstatk jeje skutkowanja. Jako wažne wuzběhnje rozmołwne koła, zo bychu so nowe rěčne rumy tworili.  Frank Kosyk z Choćebuza rozprawješe wo swojim mnohostronskim dźěle w Delnjej a srjedźnej Łužicy, mjez druhim wo zarjadowanjach z młodostnymi, swójbami a staršimi ludźimi, kaž tež wo projektach za wšě generacije. Tež w jeho dźěle ma spěchowanje rěče stajnje prioritu. Michaela Hrjehorjowa, projektna wobdźěłarka Rěčneho centruma Witaj (RCW), informowaše wo klětu planowanym ferialnym kursu za maćernorěčne dźěći, kotrež zwonka Łužicy bydla, w jutrownych prózdninach a wjacorych běžnych projektach. Tež rěčne kursy za dorosćenych a dalše synchronizowanje dźěćaceho filma připowědźi. Předsyda Domowiny, Dawid Statnik, namjetowaše: „Potrjeba rěčneho kubłanja we wšěch regionach lěto a bóle rosće. To je zwjeselace, budźi pak zwěsćenje, zo trjebamy za to hišće wjace poskitkow. Prawdźepodobnje měli wo tym přemyslić, tež maćeršćinarjow narěčeć, kotřiž bychu sebi přicpěli, jednore rěčne kursy we formje serbskich blidow podać. Tak móhli wosebje staršich Witaj-pěstowarnjow podpěrać.”