Domowina je njedźelu w socialnymaj syćomaj statistiku rozpřestrěwanja korona-wirusa w relaciji k wobydlerstwu gmejnow w našich kónčinach wozjewiła. K tomu so Dawid Statnik, předsyda třěšneho zwjazka, wupraja:„Wot spočatka pandemije wěmy, zo dyrbi prewencija rozpřestrěwanju korona-wirusa lokalnym wosebitosćam wotpowědować. Tohodla mamy sej wuwědomić, a to na bazy faktow a nic začućow, kak pola nas konkretnje wupada. Smy bazodemokratiska organizacija, naš nadawk njeje, ludźom předpisać, kak maja so hdźe a hdy zadźeržeć. Tuchwilne wuwiće pandemije w Serbach je nam pak bytostnje na škodu: Smy hordźi, zo je zhromadnosć generacijow pola nas intaktniša je hač druhdźe. Tohodla njesmě nam wšojedne być, hdyž njewobhladniwe wobchadźenje z pandemiju dźeń a wjac našich swójbnych, přećelow a znatych wohrožuje. Škitne naprawy maja pak dalši, wažny nadawk: Mamy wšo za to činić, zo ličba tych dale njestupa, kotřiž dyrbja so we chorowni lěkować dać. Je tuž wosebje škit našeho strowotniskeho systema. Ličby su dale stupace a měli nas znjeměrnjeć.Fakt je, zo je wuwiće wosebje w našich serbskich gmejnach mócne. Fakt je tež, zo mamy za to wšelke socialne interaciske kruhi (kemše, sšport, swjedźenje, zetkanja). Njeje pak naš nadawk, tam zakročić. Tež njeje spomóžne, nětko winikow pytać. Kóždy dyrbi na sebje hladać a so samoho pruwować. Cyłkownje smy w tutych nastupanjach přeoptimistiske – trjechić móže kóždeho.Po telefonaće ze statnej kencliju smy so rozsudźili, zo chcemy dźěło kraja a wokrjesa w tym podpěrać, zo ludnosć dale sensibilizujemy. Jeli so nam to njeporadźi, widźu strach dalšich a krućišich naprawow w našich gmejnach.Naležnosć je zasadne humanistiske, haj tež křesćanske prašenje. A tohodla chcemy chutne přemyslowanje nastorčić a – cyle po słowach cyrkwje: nakazanje. Dokelž tak, kaž tuchwilu běži, njepóńdźe dale.”