Zwjazkowe předsydstwo Domowiny – Zwjazka Łužiskich Serbow je so dźensa k swojemu poslednjemu posedźenju w aktualnej wólbnej dobje 2021 – 2025 na gmejnskim zarjedźe w Chrósćicach zešło.

Ze župy “Michał Hórnik” Kamjenc

Centralna tema dźensnišeho posedźenja bě aktualna situacija župy "Michał Hórnik" Kamjenc. Županka a čłonka zwjazkoweho předsydstwa Diana Wowčerjowa přednošowaše wo bywšich a aktualnych projektach. Mjez druhim přistupi loni Sportowe towarstwo Pěskecy župje. Tak, zo wobsteji župa tuchwilu z 1495 čłonkow a čłonow. Štož maja kraje we wólbach z tak mjenowanym lětom “super wólbow”, su sej lětsa Chrósćicy na kłobuk napisali. Sćěhowace terminy budu so lětsa w župje přewjesć: 800 lět Kamjenc (16.-18.05.), 800 lět Chrósćicy (13.6-22.6.), Mjezynarodny folklorny festiwal Łužica-Łužyca (26.06.-29.06.) a Pasion (04.09.-14.09.). Z próstwu wo rěčneho motiwatora za Kamjensku župu zakónči županka předstajenje aktualneje situacije w župje: “Njezabudźmy naše žro, tež my bychmy sej rěčneho motiwatora za našu kónčinu přeli.”

Myto za hospodarstwo

Zwjazkowe předsydstwo powoła za lěto 2025 tuchwilnych čłonow wuběrka za naležnosće změny strukturow, hospodarstwa a infrastruktury do mytowanskeho wuběrka za spožčenje “Myta za hospodarstwo”.

Hłowna zhromadźizna Domowiny, 5.4.2025 w SLA w Budyšinje

Zo by hłowna zhromadźizna móhła dźěłowe směrnicy a změnu wustawkow wobzamknyć, su čłonki a čłonojo dźensa wotpowědne předłohi wobjednawali.

Dale wozjewi předsyda Dawid Statnik, zo su so dotal 22 kandidatkow a kandidatow zwólniwych wuprajili, za zwjazkowe předsydstwo kandidować. Tohorunja su so namjety za poziciju předsydy a městopředsydkow resp. městopředsydow zapodali. Jeli sće wćipni, štó tući su, předstajimy je wam wot nětka na našej webstronje.

Wšě podłožki za hłownu zhromadźiznu su hižo na našej webstronje wozjewjene.

Wuhódnoćenje wólbneje doby 2021-2025

Dohromady su so čłonki a čłonojo w dobje 22 razow zetkali a to po wšej Łužicy – hač w Choćebuzu, Trjebinje, Slepom, we Wojerecach, w Budyšinje abo digitalnje. W tutym času je so gremij něhdźe 90 hodźin ze serbskimi temami zaběrał. Hač běchu to dźěławosće župow, přihot a přewjedźenje wulkoprojektow kaž Mjezynarodny folklorny festiwal Łužica – Łužyca, abo tež politiske stejišća. Wo aktiwitach zhoniće w rozprawje, kotraž je na webstronje přistupna.

Někotre čłonki a někotři čłonojo jimachu so wuhódnoćejo słowa:

“Wutrobny dźak za dobre přihotowane posedźenja. Sym rady w tutym gremiju dźěłała.”, Marja Michałkowa.

“Mě jo se źěło we workshopach spódobało. Mě jo se lubiło, až jo zwězkowe pśedsedaŕstwo pó cełej Łužycy drogowało.”, Wylem Janhoefer.

“Chcu rady trěbnosć a wažnosć tajkeho gremija wuwědomić, kotryž je dźěl demokratiskeho diskursa.”, Jan Bělk.

"To jo mója prědna runda była w tom krejzu. Smy dejali wjelike tłuste drjewo wobźěłaś. Som to pak měł ako konstruktiwne źěło. Mógu jano pominaś młodšych luźi, cyniśo how sobu.”,               dr. Hartmut Leipner

“Móžu so dopominać na 2009, jako sym startował. Sym tři jednaćelow zeznał. Wažne bě mi, zo sym moje naslědnistwo móhł rjadować, štož je so radźiło.” Milan Funka

“Sym jedyn z kandidatow, kotryž zawěsće wróćo přińdźe. Moja namołwa: Towarstwa su baza. Woni dyrbja začuwać, zo so wupłaći być čłon Domowiny.” Damian Dyrlich

Pokiwy na terminy:

• 15.-16.03.2025 jutrowne wiki w Serbskim domje w Budyšinje
• 18.03.2025 přednošk „Rany w Orchanoswkich paćerjach“ w ramiku Maćićneje akademije
• 04.04.2025 nóc bibliotekow: pod hesłom „Wědu dźělić a sej wotkryć” su zajimcy wutrobnje do Serbskeho instituta na Dwórnišćowej 6 w Budyšinje přeprošeni
• 06.04.2025 wotewrjenje wustajeńcy “Što rěka tu mjeńšina?” w Serbskim muzeju w Budyšinje