We Wojerecach je so wutoru (12.10.) wječor nowe župne předsydstwo župy „Handrij Zejler” skonstituowało. W „Lěće župow” chcedźa so najprjedy ze župnym předsydstwom župy „Dolna Łužyca” w Choćebuzu schadźować a nazhonjenja wuměnić. Župan-dwójnikaj Gabriela Linakowa a Marcel Brauman staj gremij wo konkretnym stawje jednanjow z městom wo kooperaciji při projektach w ramiku změny strukturow informowałoj. Župne předsydstwo wočakuje, zo wšě serbske institucije z hłownym sydłom w Budyšinje přichodnje tež wotnožku we Wojerecach wudźeržuja. Aktualnje chcedźa so hromadźe z wjesnymi cyłkami na wubědźowanjomaj Załožby za serbski lud „Rěč wjaza” a „simul+” Sakskeje z idejemi za wožiwjenje serbšćiny wobdźělić a přihoty za „Lěto Kocora a Zejlerja” podpěrować.