Dźensa wopyta pósłanča Serbiskeje w Němskej dr. Sněžana Jankovićova prěni raz Serbski dom w Budyšinje. Dr. Jankovićova je z lěta 2019 pósłanča Serbiskeje w Berlinje. W rozmołwje z předsydu Domowiny Dawid Statnikom a referentom Clemensom Škodu zeznajomni so wona bliže ze Serbami a serbskimi naležnosćemi. W lěće 2023 wobdźěli so wona hižo na přijeću mjezynarodneho folklorneho festiwala Łužica-Łužyca w Chrósćicach. Tehdy běše skupina Anděli ze Serbiskej z hosćom we Łužicy. Tajke a dalše kulturne wuměny sej wona wuraznje wjac přeje. Zo bychu so nitki dale pletli, přeprosy wona zastupjerjow Domowiny w Januarje do Berlina do pósłanstwa.

Foto: Domowina/Božena Šimanec