Wótra kritika na postupowanju AfD – mjeńšinowa politika njesmě być prašenje financow

Domowina, Zwjazk Łužiskich Serbow, kritizuje wčerawše postupowanje AfD w Zhorjelskim wokrjesnym sejmiku. Prawicarskopopulistiska strona bě na swojim posedźenju wokrjesneho sejmika próstwu stajiła, městna społnomócnjenych za runostajenje, za integraciju a wobdźělenje kaž tež za serbske naležnosće we wokrjesu skrótšić. Po měnjenju AfD měł so tutón nadawk přichodnje čestnohamtsce wukonjeć, dokelž pječa hižo dosć Serbow w Zhorjelskim wokrjesu njebydli.

Tutón nastork AfD, naležnosće narodnych mjeńšin kaž Serbow jeničce wot financowanja wotwisnje činić, třěšny zwjazk raznje wotpokaza. „Mjeńšinowa politika njesmě nihdy wotwisna wot połoženja kasow być“, wuzběhnje předsyda Domowiny Dawid Statnik. „Njemóže być, zo radźićeljo AfD přez taktiske argumenty prawa a potrěbnosće serbskeho ludu we wokrjesu Zhorjelc podrywać spytaja. Jeničce tři dny po wólbach do krajneho sejma pokaza AfD swoje woprawdźite mjezwočo Serbam napřećo. Namołwjam tuž wšitkich wolerjow, zo bychu sej při přichodnych wólbach dokładnje přemyslili, hdźe swój křižik sadźa.” 

Wokrjesny sejmik je próstwu AfD z jasnej wjetšinu wotpokazał – 32 hłosow za a 51 hłosow přećiwo namjetej. Zastupjer Swobodnych wolerjow a zapósłancaj skupiny Zwjazkarstwo Hornja Łužica / Swobodna Sakska přizamknyštaj so AfD. Přiwšěm pokazuje podawk znowa jasne stejišćo AfD nastupajo mjeńšinowym prawam, kotrež njemóžemy tolerować.

Domowina namołwja wšitkich politiskich akterow, so přećiwo tajkim pospytam wuprajić a sej wuwědomić, zo njesmětaj so škit a spěchowanje serbskeho ludu, kiž je přez wustawu škitany, w politiskich jednanjach znjewužiwać. „Serbski lud njesmě dźěl taktěrowanja być. Jenož jasne wuprajenja napřećo tajkim nadpadam zachowaja naše prawa“, sej předsyda žada.

Domowina budźe so dale – w zhromadnym dźěle z lokalnymi zastupjerjemi – za to zasadźować, zo by tež w přichodźe sylny hłós za Serbow w Zhorjelskim wokrjesu a zwonka njeho eksistował. Prawa Serbow a jich kulturna identita su njedótkliwe a dyrbja so konsekwentnje zakitować.

„Wočakujemy wot politiskich zastupjerjow wokrjesa a zwonka njeho, zo so jasnje na stronu Serbow a wšěch narodnych mjeńšin stupja a so wot taktiskich manewrow AfD zamylić njedadźa“, tak předsyda Domowiny.

“Město toho, zo městno šmórnjemy, žadamy sej zwyšenje dźěłoweho časa społnomócnjeneje. Domowina bě wo tym hižo w zašłosći z wokrjesami a Sakskim knježerstwom w rozmołwje. Sylniša podpěra a rozšěrjeny mandat byštej zmóžniłoj, serbsku rěč a kulturu hišće efektiwnišo spěchować a naležnosće Serbow we wokrjesu w trěbnej měrje zastupować. Njeje to jenož spjelnjenje zamołwitosće napřećo Serbam, ale tež hódny přinošk ke kulturnej mnohotnosći a towaršnostnej zwjazanosći w našim regionje”, wudospołnja županka Domowinskeje župy Jakub Lorenc-Zalěski Diana Maticowa.