Wčera popołdnju je so wjac hač 20 zastupjerjow na digitalnym wuradźowanju AG Non-Kin-state FUEN, mjeńšin bjez maćerneho kraja wobdźěliło, ze stron Serbow předsyda Domowiny, Dawid Statnik, a Fabian Jacobs, čłon zwjazkoweho předsydstwa třěšneho zwjazka. To bě wjac wobdźělnikow hač na prjedawšich wuradźowanjach z prezencu čłonow. Serbow zajimowaše wosebje přednošk wo naprawach za dalše wozrodźenje walizišćiny, z kotrymiž chcedźa we Waliziskej ličbu rěčnikow hač do lěta 2050 wot 600.000 na jedyn milion stopnjować. Hižo před lětami je serbska delegacija tam była, zo by so s tamnišimi rěčnymi strategijemi zeznajomiła. Facit Dawida Statnika: „Na tutym přikładźe spóznawamy: Přichod rěče a jeje zakótwjenje w młodźinje tworitej prěnjotnje digitalizacija a zjawne připóznaće. Na tym so strategsike planowanje Serbow, tež Domowiny, załožby a serbskeju radow orientuje.” Pokiw za medije: Jeli maće dalše prašenja k wotběhu zetkanja (běše tež přednoškow wo sewjernych Frizach, połoženju w Bretoniskej a ze stron Towaršnosće za wohrožene ludy, GfbV, powšitkownje wo situaciji mjeńšin na swěće), steji Wam Dawid Statnik rady k dispoziciji.