Štwórtk popołdnju (03.02.2022) je so wuběrk Domowiny za nutřkownu demokratiju a serbsku ciwilnu towaršnosć online skonstituował. Kaž přisłušna referentka za naležnosće třěšneho zwjazka, Madlena Di Sarnowa, informowaše, su čłonojo gremija jako nawodu wuběrka Damiana Dyrlicha wuzwolili. Jeho naměstnik je Marko Hančik, městopředsyda Domowiny.

Wuběrk chce so hłubšo z wólbami serbskich gremijow - tak tež Domowinskich - zaběrać a konkretne namjety wudźěłać. Tule dźe na přikład wo móžne direktne wólby předsydstwa a prašenje, kak móža wjac zajimowanych kruhow do wotběhow třěšneho zwjazka zapřijeć a wo tym wšěm zjawnje diskutować. Runje tak budźe so wuběrk z kritiskimi wuprajenjemi w zwisku ze zašłej hłownej zhromadźiznu rozestajeć, zo by baza towarstwow, župow a Domowinskich skupinow lěpje wobdźělena była.

Nimo toho planuje wuběrk so nadawkam wěnować, kotrež poćahuja so hłownje na nutřkotowarstwowe poměry, mjezsobny wobchad a dźěło z čłonstwom třěšneho zwjazka. Ale tež zhromadne dźěło z cyrkwjemi, komunalnymi akterami a druhimi relewantnymi kruhami budźe wobstatk dźěła. Na swojim prěnim wuradźowanju w nowej wólbnej periodźe dojednachu so čłonojo wuběrka, zo chcedźa dalšich fachowcow za sobudźěło zdobyć.