Jutře, pjatk, 3. smažnika/junija wot 17. Hodź. wotměje so lětuša wurjadna hłowna zhromadźizna Domowiny w „Hali wuměłstwa Łužica” (adresa: Pśiwózna droga / Güterzufuhrstraße 7, 03046 Cottbus-Chóśebuz) w Choćebuzu. Jenički tema budźe zaručenje prawniskeje płaćiwosće wot lońšeje hłowneje zhromadźizny wobzamknjenych změnow wustawkow třěšneho zwjazka.

21. (wurjadna) hłowna zhromadźizna přewjedźe so na zakładźe artikla 7 wotrězk 8 wustawkow Domowiny („Wurjadnu hłownu zhromadźiznu zwoła zwjazkowe předsydstwo abo předsyda na požadanje znajmjeńša třećiny sobustawskich towarstwow. Wona ma so w běhu třoch měsacow přewjesć”). Wona ma wopodstatnić změnu wustawkow Domowiny. Namjety so wobšěrnje do hłowneje zhromadźizny diskutowachu. W tutym procesu měješe kóždy čłon Domowiny składnosć, swoje namjety a pokiwy zapodać. Dźěłowy prezidij hłowneje zhromadźizny zestaja so z prezidija zwjazkoweho předsydstwa a jednaćelow Domowiny. Wotběh hłowneje zhromadźizny moderěruje zastupowacy jednaćel Marcus Końcaŕ w delnjoserbskej rěči.

Podłožki njejsu jenož delegatam dóšli, ale su tež hornjo-, delnjoserbsce a němsce na internetnej stronje Domowiny přistupne: https://www.domowina.de/hsb/domowina/hlowna-zhromadzizna/translate-to-hsb-21-hauptversammlung-2022

Zajimcy móža zhromadźiznje tež přez YouTube-kanal Domowiny slědować. Link namakaće pod https://youtu.be/MmdAXQTK1-E

Tomu so w 19 hodź. na samsnym městnje wotewrjenje wustajeńcy „Serbscy wuměłcy a Serbja we wuměłstwje” přizamknje, na kotrež su wšitcy delegaća a hosćo hłowneje zhromadźizny wutrobnje přeprošeni.

Tuta wurjadna hłowna zhromadźizna so z 48 delegatami přewjedźe, to rěka nimo zwjazkoweho předsydstwa, w kotrymž su župy a nadregionalne towarstwa hižo zastupjene, hišće jedyn delegat kóždeje župy resp. kóždeho nadregionalneho towarstwa. Prosymy hosći/zajimcow, so pola sekretariat@domowina.de přizjewić, žurnalistam steji předsyda Dawid Statnik pod mailowej adresu dawid.statnik@domowina.de k dispoziciji.