Župa „Handrij Zejler” je za planowanu šćežku „Via Sorabica HoyWoj” wo serbskich stawiznach města přidźěło měšćanskeho muzeja dóstała. Wo tym je zamołwity za projekt Werner Sroka wutoru, 29.3., nawječor župne předsydstwo informował. Nětko chce reginalna rěčnica Sonja Hrjehorjowa ze serbskej projektnej managerku města wo pokročowanju projekta jednać.

Přichodnej wjerškaj župy budźetej składnostnje wopyta delegacije z Wendlandskeje 9. meje přednošk wo tehdomnišich Słowjanach we wonych kónčinach a 12.5. Serbski wječork hromadźe z Domowinskej skupinu w Nowym měsće. W ramiku projekta „Rěčna krajina we Wojerowskim regionje njech kćěje”, mytowaneho w simul+-wubědźowanju, zběraja nětk mjena ludźi, kotřiž su nošerjo wjesnych dialektow. Jich žiwu lokalnu serbšćinu chcedźa nahrawać.

Župne předsydstwo so jasnje wupraja, zo smě so na lětušej wurjadnej hłownej zhromadźiznje Domowiny w mjeńšim kruhu jenož to wobzamknyć, štož dyrbi so posudka hamtskeho sudnistwa dla prawnisce w nowych wustawkach změnić.