21. wurjadna hłowna zhromadźizna Domowiny je so pjatk, 3. smažnika, we Wuměłskej hali Łužica w Choćebuzu wuspěšnje zakónčiła. Wona bu na doporučenje čłonskich towarstwow a župow zwołana. Jenički tema běše změna wustawkow Domowiny. Na lońšej 20. hłownej zhromadźiznje wobzamknjene změny wustawkow njejsu so wot hamtskeho sudnistwa připóznawali. Tuž je Zwjazkowe předsydstwo předźěłany naćisk předpołožił. Tutón wobsahowaše lońše namjety, kotrež su so na trěbnych městnach wukmanili.

Hinak hač hewak přewjedźe so wurjadna zhromadźizna jenož w małym kruhu. Nimo 30 čłonkow a čłonow Zwjazkoweho předsydstwa přeprosy Domowina stajnje jednu zastupjerku / jednoho zastupjerja čłonskeho towarstwa abo župy. Jednaćelka Judit Šołćina k tomu: “Přihoty hłowneje zhromadźizny smy hižo w januarje zahajili. Tak wuradźowachmy tehdy z čłonskimi towarstwami a župami wo móžnym kluču delegatow. Hladajo na tehdy hišće wobstejace wobmjezowanja pandemije dla, su so wšitcy za pomjeńšeny kluč delegatow rozsudźili. Wjeselimy so dźensa, zo mamy składnosć zhromadźiznu na městnje přewjesć a tak lěpšu wuměnu měnjenjow zmóžnić”.

Předsyda Domowiny, Dawid Statnik, rozjimaše z pomocu prezentacije naćisk prawnisce trěbnych změnow wustawkow, z kotrymiž dyrbješe wurjadna hłowna zhromadźizna pokiwam Drježdźanskeho zarjadniskeho sudnistwa wotpowědować, zo bychu na lońšej hłownej zhromadźiznje wobzamknjene nowe wustawki płaćiwosć nabyli. Zdobom wobkedźbowali su so tež tři namjety, kotrež su so w ramiku zjawneje diskusije zapodali.

Předpołoženy naćisk je wuslědk měsacy trajaceho dźěłoweho procesa čłonskich towarstwow a župow, prawniskeho wuběrka Domowiny, prezidija a Zwjazkoweho předsydstwa Domowiny.

Slědowaca diskusija běše čiła a pokaza, zo su so delegatki a delegaća intensiwnje z naćiskom zaběrali.

Nimo wobsahowych prašenjow a pokiwow přednjesechu so tež měnjenja zasadneho razu.

We wuslědku diskusije schwalichu 39 delegaća z wjetšinu změnjeny namjet wustawkow. Zarjad Domowiny ma změny nětko hamtskemu sudnistwu a finančnemu zarjadej předpołožić. Přiwzali hamt změny, su wustawki płaćiwe.

Statnik po zarjadowanju: “Wjeselu so, zo smy zhromadnje zamóhli naše wustawki na změnjene potrjeby dźensnišeho časa wusměrić. Tak mamy nětko moderne rjadowanje za dźěło gremijow, tež za pad dalšeho móžneho pokročowanja pandemije. Potom móžemy posedźenja tež hybridnje abo digitalnje přewjesć. Wjeselu so tež, zo su so delegatki a delegaća tak intensiwnje do procesa zapřijeli. Čiłu diskusiju hódnoću jako znamjo aktiwneho třěšneho zwjazka, w kotrymž je móžno, wšelke nalady, měnjenja a intencije mjez sobu wotewrjenje wuměnjeć.”.

Podłožki posedźenja su w hornjoserbšćinje, delnjoserbšćiny a němčiny na internetnej stronje Domowiny přistupne: https://www.domowina.de/hsb/domowina/hlowna-zhromadzizna/translate-to-hsb-21-hauptversammlung-2022

Zajimcy móžachu zhromadźiznje tež přez YouTube-kanal Domowiny slědować. Link je dale přistupny pod https://youtu.be/MmdAXQTK1-E.

Zarjadowanju přizamkny so w 19 hodź. na samsnym městnje wotewrjenje wustajeńcy „Serbscy wuměłcy a Serbja we wuměłstwje”, na kotruž běchu wšitcy delegaća a hosćo hłowneje zhromadźizny wutrobnje přeprošeni.

Wosebita wustajeńca skići wot 4. junija sem dohlad do wuměłskeho tworjenja serbskich a dalšich wuměłcow. Dołhi čas zwobraznichu so serbske motiwy a temy we wuměłstwje z wida třećich. Idyliske žiwjenje na wsy, Błóta, drasty a nałožki, wosebita pobožnosć – mnohich němskich wuměłcow to přićahny. Z někotrymi wuwzaćemi móžemy wo wutworjenju samostatneho serbskeho tworjaceho wuměłstwa hakle z rozmachom serbskeho narodneho hibanja po prěnjej swětowej wójnje rěčeć.

Aktualna wustajeńca zjednoća wobě stronje. Widźeć su serbscy molerjo 20. lětstotka kaž Fryco Latk, Alfred Janigk, Conrad Felixmüller a Jurij Hajna/Georg Heine kaž tež načasni wuměłcy Iris Brankačkowa, Hella Stoletzki abo Jan Buk. Grafiki Adolfa Burgera a Alberta Kretschmera kaž tež mólby A. Junghansa, Karla Hensela a Bertholda Genzmera posrědkuja wid němskich wuměłcow na serbski žiwjenski swět.

Nimo dźěłow z priwatneje Choćebuskeje zběrki su požčonki Choćebuskeho Serbskeho muzeja a z priwatneje ruki we wustajeńcy widźeć.