Kubłanje wostanje centralna temaŠtyri njedźele do 19. hłowneje zhromadźizny Domowiny, dnja 5. měrca, wotmołwištaj předsyda Domowiny Dawid Statnik a zastupowacy jednaćel Domowiny Marcus Końcaŕ w Choćebuzu na nowinarskej rozmołwje Domowiny prašenja žurnalistow.19. hłowna zhromadźiznaDnja 30. měrca zeńdu so w Chrósćicach něhdźe 190 delegatow ze wšěch župow a čłonskich towarstwow Domowiny k 19. hłownej zhromadźiznje Domowiny. Jako čestni hosćo su so mjez druhim přizjewili sakski ministerski prezident Michael Kretschmer, čłon Zwjazkoweho sejma dr. Klaus-Peter Schulze a społnomócnjeny zwjazkoweho knježerstwa za prašenja wusydlencow a narodne mjeńšiny dr. Bernd Fabritius.„Na połojcy legislaturneje doby budźemy tam naše dotalne dźěło bilancować a nowe dźěłowe směrnicy za dobu hač do 20. hłowneje a wólbneje zhromadźizny 2021 schwalić“, praji předsyda Domowiny Dawid Statnik. W swojej rozprawje chce so wón wosebje wěnować dźěławosći třěšneho zwjazka, aktualnym a nowym politiskim wužadanjam a aktiwitam čłonskich cyłkow. Dalše informacije wo dźěle zwjazkoweho předsydstwa, župow a towarstwow w zašłymaj lětomaj so w delegatnej mapje wozjewja. W naćisku nowych dźěłowych směrnicow za dobu wot 2019 do 2021 namjetuje zwjazkowe předsydstwo na přikład, zo přewjedźe Domowina šěroku diskusiju k jeje wustawkam: Zaměry a struktury Domowiny, rjadowanje čłonstwa, juristiske zastupowanje třěšneho zwjazka a dalše prašenja maja so w organach Domowiny a ze župami kaž tež w sobustawskich towarstwach/zwjazkach diskutować. Zaměr je naćisk za nowelěrowanje wustawkow Domowiny. Dalši dypk nastupa wuši zwisk gremijow k bazy Domowiny, Domowinskim skupinam a towarstwam. Tute wočakowanje jewješe so tež w loni wot Domowiny přewjedźenym naprašowanju čłonow wšěch serbskich towarstwow a zwjazkow. Dr. Judith Jahn z Lipska, kiž je naprašowanje wuhódnoćiła, budźe na hłownej zhromadźiznje hišće raz hłowne wuslědki předstajić.Tež wobkedźbowanje serbskich zajimow w procesu strukturneje změny we Łužicy budźe wažny wobsahowy dypk na hłownej zhromadźiznje. Předwidźane je, zo předsyda wuběrka za hospodarstwo a turizm Marko Kliman lońšu strukturnu konferencu Domowiny wuhódnoći a na konkluzije za dalše postupowanje Domowiny skedźbni.Dale wěnuje so na próstwu młodźinskeje přirady wosebity dypk dnjoweho porjada hłowneje zhromadźizny předstajenju serbskeho młodźinskeho hibanja w Hornjej Łužicy.A nic naposledk přiwozmje so towarstwo z Łuchowa/Lüchow (Wendland) – Wendischer Freundes- und Arbeitskreis e. V. – na namjet zwjazkoweho předsydstwa doskónčnje jako asociěrowany čłon Domowiny.Domowina ma něhdźe 7.400 čłonow. Woni su w 5 župach a w 13 nadregionalnych specifiskich towarstwach organizowani. KubłanjeLipšćanski Institut za sorabistiku je w nadawku Krajneho instituta za šulu a medije Berlin-Braniborska (LISUM) přewjedł ewaluaciju Witaj-kubłanja w Delnjej Łužicy. Njedawno wozjewjene wuslědki su mnohich znjeměrnili. Hłowna zhromadźizna župy Delnja Łužica dnja 1. februara je tohodla wobzamknyła, zo ma so lětsa přewjesć kubłanska klawsura. Zwjazkowe předsydstwo Domowiny je to na swojim posedźenju dnja 15. februara w Budyšinje wobkrućiło a schwaliło. Rěčny centrum WITAJ kubłansku klawsura tuchwilu přihotuje. Wona wotměje so dnja 10. apryla w Choćebuzu. Zastupjerjo serbskich institucijow budu tam trěbne politiske kročele a naprawy za Delnju Łužicu diskutować, kwalifikować a na samsnym dnju wothłosować. Woni tworja zakład dalšeho postupowanja na politiskim polu.Tež w Hornjej Łužicy je kubłanje wažna tema. Tak je župa „Jan Arnošt Smoler“ Budyšin na swojej lětušej hłownej zhromadźiznje wobzamknyła, namjetować 19. hłownej zhromadźiznje Domowiny, zo by nastorčiła „ewaluaciju wučby serbšćiny w najšěršim zmysle w serbskim sydlenskim rumje, zo by so wučba serbšćiny za kóžde dźěćo na wysokim niwowje dale zaručiła.“Mjezynarodny folklorny festiwalWot 4. do 7. julija witaja w Budyšinje, Hochozy a Chrósćicach wuhotowarjow a hosći XIII. Mjezynarodneho folklorneho festiwala „Łužica“. Po přećahu po Budyšinje štwórtk popołdnju wotměje so wječor zahajenski program w Němsko-Serbskim ludowym dźiwadle. Lubowarjo mjezynarodneje kultury ludow smědźa so zaso na mnoho překwapjenkow wjeselić. Připrajili su na přikład skupinje z Peru a Boliwiskeje, skupinka z Nepala, kiž prezentuje program swojeho imaterielneho kulturneho herbstwa, kaž tež hosćo z Algeriskeje a Japanskeje a wězo dalše ansamble z Europy. Mjez nimi su skupina „Harrukern“ z Madźarskeje, cyłk z Pólskeje a młodźinski orchester z pólskeho partnerskeho města Lesnica, kiž přewjedźe w času festiwala probowe lěhwo w Hórkach a Chrósćicach.Wosom cyłkow z Hornjeje, srjedźneje a Delnjeje Łužicy pokazuje swoje programy w Budyšinje, Hochozy a Chrósćicach. „Wosebitosć w Hochozy je za mnohich ludźi swójbna atmosfera. Dwory su mjeńše hač na přikład w Chrósćicach, přez čož su hosćo wuměłcam wo wjele bliže“, praji Marcus Końcaŕ. Tež w Hochozy změja zaso regionalne chłóšćenki na předań a jako zakónčenje je wšěm kazane na zhromadne reje z kapału nAund.Za program „W raju wjesołych dźěći“ sobotu popołdnju w Chrósćicach předleži přihotowanskemu wuběrkej 11 přizjewjenjow, mjez nimi su skupinje z Brětnje a Slepoho, serbske zakładne šule Chrósćicy, Worklecy a Ralbicy, dźěćaca skupina towarstwa „Stup dale“ z Drježdźan a „Łužičanka“.Festiwalne finale wotměje so po zwučenym wašnju njedźelu popołdnju w Chrósćicach.