Přihot přichodneho posedźenja Zwjazkoweho předsydstwa Domowiny steješe w srjedźišću posedźenja prezidija Domowiny dnja 21.03.2018 we Wojerecach. Pod nawodom předsydy Domowiny Dawida Statnika zaběrachu so čłonojo gremija z aktualnym stawom Europskeje byrgarskeje iniciatiwy Minority SafePack. “Wjeselimy so, zo je iniciatiwa mjeztym žadanje spjelniła, w sydom krajach trěbnu ličbu podpismow docpěć. Faluja pak hišće 75.000 podpismow, zo bychmy tež jedyn milion podpismow docpěli. Smy potajkim krótko před cilom. Tuž prosymy kóždeho, akciju podpěrać. Namołwjamy tež, wšitke dotal hromadźene podpisma w běhu přichodnych dnjow pola Domowiny wotedać”, tak Statnik. Podpisma móža so hač do 03.04.2018 na stronje www.minority-safepack.eu zapodać.Dale zaběraše so prezidij z namjetami delegowanja. Tak deleguje Domowina mjez druhim skupinu Přezpólni k Čěskej bjesadźe w Daruvaru/Chorwatska, Serbski sokoł na Wšosokołski zlět do Prahi, Serbski folklorny ansambl Wudwor do Žalec/Słowjanska a Serbsku rejowansku skupinu Smjerdźaca do Arequipa/Peru. Přichodne posedźenje Zwjazkoweho předsydstwa Domowiny wotměje so 27.04.2018 w Budyšinje. Přichodne regularne posedźenje prezidija Domowiny wotměje so 18.04.2018 we Wojerecach.Dawid Statnik, předsyda Domowiny