Župne předsydstwo župy „Handrij Zejler” je na swojim posedźenju srjedu popołdnju znowa załožene serbske towarstwo „Zahrodka 1921 z.t.” do Domowiny přiwzało. Wotpowědnu próstwu je dopołdnja w radnicy Delnjeho Wujězda předsyda towarstwa a wjesny předstejićer Frank Knobloch regionalnej rěčnicy Soni Hrjehorjowej přepodał. K projektam iniciatorow „Zahrodki” słuša (dotal digitalny) kurs serbšćiny za započatkarjow. Dale su čłonojo župneho předsydstwa jako kandidatce za wólby zwjazkoweho předsydstwa Domowiny na lětušej hłownej zhromadźiznje třěšneho zwjazka Lubinu Dučmanowu a Milu Libšowu pomjenowali. Zdobom podpěruje župne předsydstwo jednohłósnje kandidaturu Dawida Statnika za dalšu dobu jako předsyda Domowiny. Hłowna w wólbna zhromadźizna župy budźe pjatk, 17. septembra, we Wojerowskej Kulturnej fabrice. Swjatočne wotkryće noweje wopomnjenskeje tafle „W tutym domje załožichu so 24.7.1921 župy Domowiny, Zwjazka Łužiskich Serbow” při radnej pincy we Wojerecach so prózdnin dla hižo sobotu, 17. julija, zhromadnje z małym serbskim zarjadowanjom za wšěch zajimcow wotměje. Podlěšiło je župne předsydstwo pandemije dla čas zapodaća za cyłołužiske wubědźowanje „moja najlubša kamishibai-powědka” hač do 15. oktobra.Foto: Frank Knobloch přepoda Soni Hrjehorjowej w Delnjowujězdźanskej radnicy próstwu znowa załoženeho towarstwa „Zahrodka 1921 z.t.” wo přiwzaće do Domowiny. Foto: Domowina.