Župa „Jan Arnošt Smoler” Budyšin je wyšemu měšćanosće Alexanderej Ahrensej list w naležnosći planowaneho pomnika Bismarcka pósłała. Podpisała je list tuchwilu amtěrowaca županka Jana Pětrowa. Fota: Jurij Łušćanski.

Tekst lista namakaće z fotami (za bjezpłatny download) jako dokumentaciju tež w blogu Domowiny:

https://domowina.blog/2021/10/18/zupa-jedyn-pomnik-bismarcka-na-luziskich-horach-dosaha/

Město Budyšin

Měšćanosta A. Ahrens

Mjasowe wiki 1

02625 Budyšin

Budyšin, dnja 15.10.2021

Česćeny knjez měšćanosta Ahrens,

ze zadźiwanjom smy čitali, zo je Měšćanska rada Budyšina na njedawnym wuradźowanju namjetej towarstwu “Bautzener Liedertafel” znowa pomnik kanclera Otto von Bismarcka na Czornoboze nastajić, přihłosowała. Sobustawojo župy “Jan Arnošt Smoler” Budyšin zjawnemu listej Serbskeho instituta (z dnja 11.10.t.l.) přihłosujemy.

Zapodaćelow namjeta za Bismarckoweho pomnika na Czorneboze a sobustawow Měšćanskej rady chcemy skedźbnić na dale eksistowacy Bismarckowy pomnik na Mnišońcu. Tutón Bismarckowy pomnik, prawje Bismarck Bank z lěta 1893 – z wuprajenjemi “Wir Deutschen fürchten Gott/Und sonst Nichts auf dieser Welt” (citat z narěče kanclera 6. febr. 1988) pod wobrazom a cyle deleka “Wie Ihr wisset, an den Wimpern/Lässt sich Bismarck nicht gern klimpern;/Drum schont die Bank fürsichtiglich,/sonst knurrt der Alte fürchterlich.” Pismje a wobraz su wězo ze železa zhotowjene. Pomnik postajić dał je G. Krantz, wobsedźer Sakskeje próškoweje fabriki Budyšina.  

Tutón pomnik z kanclerowym přeswědčenjom, zo Němc so jenož Boha boji, ale tež z ludowym, šibałym wuprajenjom, što stareho hněwa “fürchterlich”..., je po swojim cyłkownym charakteru nimale wšitke časy na Mnišońcu přetrał. Po 1945 so wšitke železne platy “zhubichu”, zdźěla so pozdźišo zaso namakachu. K 200. kanclerowym narodninam 2015 je pomnik dźakowano gmejnow Hornja Hórka a Budestecy zaso kompletny a zwjesela tak na nimale 130 lět pućowych z bliska a daloka.

Naše přeswědčenje je, zo jedyn pomnik kanclerej Otto von Bismarck na łužiskich horach dosaha. Smy přećiwo dalšemu pomnikej a ćim bóle na horje po słowjanski bohu pomjenowanej.

Mamy za to, zo hodźa so pjenjezy “Bautzener Liedertafel” lěpje wužiwać, na přikład za “tafle”, hdźež sebi mjenje zasłužacy, wosebje starši ludźo a swójby, wšědnu cyrobu wotewzaja.

W mjenje župneho předsydstwa “Jan Arnošt Smoler” Budyšin